Cueva de Valmori

Cueva de Valmori
	Bien d'Interés Cultural
	monumentu y cueva con arte prehistórico (es)
Llocalización
País	España
Autonomía	Principáu d'Asturies
Provincia	provincia d'Asturies
Conceyu	Llanes
Coordenaes	43°25′30″N 4°50′12″W / 43.4251°N 4.8368°O
	Cueva de Valmori Cueva de Valmori (Asturies)
Patrimoniu
BIC	RI-51-0010081

La Cueva de Valmori, tamién nomada Cueva del Pradón, la Cuevona y Cueva la Ería, ye una cueva asitiada nel conceyu asturianu de Llanes. declarada Bien d'Interés Cultural cola categoría de Monumentu.

Descripción[editar | editar la fonte]

La cueva alcuéntrase nel sector nororiental del cordal de La Llera, cercana a la cueva d'El Quintanal, asitiaes dambes nel llugar de Valmori, parroquia de Barru, conceyu de Llanes.

La primer mención de la esistencia d'esta cueva, ye la que se fae’n Les Cavernes de la Région Cantabrique, obra qu’amuesa una descripción bastante precisa de la so morfoloxía y alúdese al importante xacimientu arqueolóxicu del antepar. Esti foi escaváu darréu pol Conde de la Vega del Sella nos años 1915 y 1916, quien determinó que la so secuencia d'ocupación ye un arcu cronolóxicu que va del Solutrense ^{[n 1]} al Asturiense.

Nel añu 1969, Geoffrey A. Clark^{[n 2]}, calicatió en dellos niveles, señalando la esistencia pelo menos, de niveles Asturiense (en superficie), Aziliense, Magdaleniense ^{[n 3]} superior y mediu, Solutrense superior y Auriñacense ^{[n 4]}.

La cueva cunta con dos boques d'entrada abiertes pal sureste. La primera, a l’altura de l’amplia ería esistente al norte’l pueblu de Valmori; y la segunda, que constitúi'l principal accesu a la cueva, a la derecha y unos metros percima l'anterior. Pola so proximidá a l'Autovía del Cantábricu A-8, ye d’albidrar, que la construcción d'esta afeutare de mou y manera grave, a la dinámica cárstica de la cueva.

No que cinca al arte parietal, cunta con una representación de motivos artísticos paleolíticos, que tamién tán abondo presentes n'otres cueves llanisques (anque ensin algamar la bayura artística de les de conceyos vecinos como son les del Pindal o Tito Bustillo).

Les representaciones qu'alluga redúcense a un conxuntu de motivos astrautos repartíos en dos grupos (desanubríos al respuetive’n 1968 por José Manuel Suárez Diaz Estébanez, y 1972 por Javier Suárez Fernández y Pedro Fernández Muñiz). El primer grupu alcuéntrase a unos 25 metros de la boquera principal, nuna cámara pequeña con forma de círculu, aportándose a esta dende la galería per una gatera. Consta namái de trés series de puntuaciones, feches con pintura de color bermeyo, más delles llínies ya manches del mesmu color. Nesta cámara tamién son visibles unos puntos fechos con pintura prieta de cronoloxía paleolítica más duldosa.

Polo que se refier al segundu grupu, alcuéntrase nel fondu la cueva, a más de 120 metros de la entrada. Presenta un laciforme, una llinia de contornu’n forma de D y un signu circular, fechos toos con pintura bermeya.

Polo poco significativu del conxuntu resulta enforma aventuráu aldovinar la so cronoloxía. Les agrupaciones de puntos ufierten trayectories asemeyaes con cueves asturianes como les d'El Pindal (Ribedeva) o Sarriu (El Valle Altu de Peñamellera), asina como coles cántabres de Chufín (Puentenansa) o El Castillo (Puente Viesgo), ente otres.

Respeutu a oxetos d’arte mobiliar, son de señalar, ente otres escavaciones, les executaes en 1969 por Geoffrey A. Clark, nes que s’atopáron nun primer nivel escarrapios d'industria Asturiense, cascarielles, restos de fauna y un fragmentu de caxada d'un neñu, que seríen dataos ente los años 9500 y 7000 AP. Pola so situación estratigráfica, nun esiste denguna dubia de qu'estos afayos correspuenden a la dómina Asturiense.

Tamién afayáronse na cueva otres ferramientes, como azagayes de doble punta ^{[n 5]} y azagayes de forcadura ^{[n 6]}, amás de llámines atoscaes, llámines retocaes, y pequeñes llámines de dorsal, ferramientes qu’amuésense nel Muséu Arqueolóxicu d'Asturies, n'Uviéu.

La cueva de Valmori foi declarada Bien d'Interés Cultural n'aplicación del artículu 40.2 de la Llei 16/85, de 16 de xunu, del Patrimoniu Históricu Español, que concedió esta declaración a les cueves, abrigueos y llugares que contuvieren manifestaciones d'arte rupestre. Darréu, el Principáu d'Asturies, per aciu del Decretu 120/2009, de 16 de setiembre (B.O.P.A.. númberu 229, de 2 d'ochobre de 2009), procedió a marcar les llendes pa la proteición de la Cueva de Valmori (conxuntamente cola d'El Quintanal).

Notes[editar | editar la fonte]

↑ Solutrense: Períodu del Paleolíticu Superior, na transición del Gravetiense al Magdaleniense, desarrolláu’n Francia y na península ibérica. El so nome provien de los xacimientos de Crôt du Charnier, en Solutré (rexón de Borgoña).
↑ Geoffrey George Anderson Clark: Paleoantropólogu, profesor de la School of Human Evolution & Social Change, de l’Arizona State University, Espublizó en 1974, Excavations in the Late Pleistocene cave site of Balmori, Asturias [Spain], Quaternaria 18 (pax. 383-426), y en 1975, La cueva de Balmori [Asturias, España]: nuevas aportaciones [con V. Clark], Trabajos de Prehistoria 32 (pax. 35-77).
↑ Magdaleniense: Una de les postreres cultures del Paleolíticu superior n’Europa occidental. Carauterizose pola industria lítica y ósea, y asocedió a la cultura Solutrense. El so nome provien de La Madeleine, cueva francesa na Dordoña.
↑ Auriñacense: Primer períodu del Paleolíticu superior, carauterizáu pola apaición de ferramientes forgaes en güesu y pola realización de les primeres pintures rupestres. Asocedió a la cultura Musteriense, y el so nome provien del llugar d’Aurignac (na Occitania francesa).
↑ Azagaya de doble punta: Arma blanca de cuernu o güesu, colos estremos puntiaos. Usábase na caza aventándola cola mano.
↑ Azagaya de forcadura: Arma blanca de cuernu o güesu, con forma de forcáu nun estremu.

Referencies[editar | editar la fonte]

Esti artículu ye una obra derivada de la disposición relativa al procesu de declaración d'un bien cultural o natural, asoleyada nel B.O.P.A. númberu 229, de 2 d’ochobre de 2009, testu que ta llibre de restricciones conocíes, en virtú del derechu d'autor de conformidá col artículu 13 del Testu Refundíu de la Llei de Propiedá Intelectual (B.O.E. númberu 97, de 22 d’abril de 1996).

Declaración de Contorna de Proteición de Bien d’Interés Cultural: http://www.asturias.es/bopa/2009/10/02/2009-22328.pdf

Ficha de Bien d’Interés Cultural:https://sig.asturias.es/hipervinculos/Bienes_Interes_Cultural/Fichas_BICs/360201001000BIC.pdf

Bibliografía[editar | editar la fonte]

Alcalde del Río, Hermilio; Breuil, Henri; y Sierra, L: Les cavernes de la Région Cantabrique. Imp. A. Chêne. 1911. Mónaco.
Clark, Geoffrey A.: “La Cueva de Balmori (Asturias. España): Nuevas aportaciones”. Trabajos de Prehistoria. Vol. 32, (pax. 35-78). 1975. Madrid.
Garralda, Mª Dolores: Llanes:Las mandíbulas de Balmori y Mazaculos II. Asturias. Boletín del Real Instituto de Estudios Asturianos nº 103 (pax. 595-603). 1981. Uviéu.
Barroso del Río, Ofelia y del Río Berguño, Federico: Arte rupestre. La prehistoria ilustrada en las cuevas del oriente de Asturias. Monografías del Oriente de Asturias n.º 4 (pax. 76). Llanes. 2008.
VV.AA.: Asturias concejo a concejo. Llanes, Ribadedeva. Real Instituto de Estudios Asturianos / Caja de Ahorros de Asturias. Colección Asturias concejo a concejo n.º 2. (pax. 54 y ss.). 1993. Uviéu.

↑ «base de datos de monumentos de Wiki Loves Monuments» (13 payares 2017).

[2] Solutrense: Períodu del Paleolíticu Superior, na transición del Gravetiense al Magdaleniense, desarrolláu’n Francia y na península ibérica. El so nome provien de los xacimientos de Crôt du Charnier, en Solutré (rexón de Borgoña).

[3] Geoffrey George Anderson Clark: Paleoantropólogu, profesor de la School of Human Evolution & Social Change, de l’Arizona State University, Espublizó en 1974, Excavations in the Late Pleistocene cave site of Balmori, Asturias [Spain], Quaternaria 18 (pax. 383-426), y en 1975, La cueva de Balmori [Asturias, España]: nuevas aportaciones [con V. Clark], Trabajos de Prehistoria 32 (pax. 35-77).

[4] Magdaleniense: Una de les postreres cultures del Paleolíticu superior n’Europa occidental. Carauterizose pola industria lítica y ósea, y asocedió a la cultura Solutrense. El so nome provien de La Madeleine, cueva francesa na Dordoña.

[5] Auriñacense: Primer períodu del Paleolíticu superior, carauterizáu pola apaición de ferramientes forgaes en güesu y pola realización de les primeres pintures rupestres. Asocedió a la cultura Musteriense, y el so nome provien del llugar d’Aurignac (na Occitania francesa).

[6] Azagaya de doble punta: Arma blanca de cuernu o güesu, colos estremos puntiaos. Usábase na caza aventándola cola mano.

[7] Azagaya de forcadura: Arma blanca de cuernu o güesu, con forma de forcáu nun estremu.

[da0c7f822fae50188375759d43562aad76ee6bfe-1] «base de datos de monumentos de Wiki Loves Monuments» (13 payares 2017).

[1]

[n 1]

[n 2]

[n 3]

[n 4]

[n 5]

[n 6]